Սեպտեմբերի 17-ին հունական ծագումով ամերիկացի ազդեցիկ գործարար և քաղաքական գործիչ Քրիս Սփիրուի գլխավորությամբ մի խումբ ուղղափառներ պատրաստվում են այցելել Ստամբուլում գտնվող Սուրբ Սոֆիայի տաճար` այնտեղ աղոթելու և պատարագ մատուցելու նպատակով: Այս մասին տեղեկացնում է Haberturk-ը:

ԱՄՆ Դեմոկրատական կուսակցության ակտիվ գործիչ, Նյու Հեմփշիրի նախկին նահանգապետ և մեծահարուստ Քրիս Սփիրուն, որը, միևնույն ժամանակ, «Ազատ Սուրբ Սոֆիա» միջազգային կազմակերպության նախագահն է, Սուրբ Սոֆիայում պատարագ մատուցելու առնչությամբ ոչ մի թույլտվություն չի վերցրել թուրքական իշխանություններից: Փոխարենը, Սփիրուն նամակ է գրել Թուրքիայի վարչապետ Ռեջեփ Թայիփ Էրդողանին և Թուրքիայի կրոնական հարցերով վարչության ղեկավար Ալի Բարդաքօղլուին և նրանց, ինչպես նաև մի շարք այլ բարձրաստիճան թուրք պաշտոնյաների հրավիրել պատարագի արարողությանը:

Քրիս Սփիրուն 2005թ. ստեղծել է «Ազատ Սուրբ Սոֆիա» միջազգային կազմակերպությունը, որի նպատակն է իր նախկին կարգավիճակին վերադարձնել նախ մզկիթի, իսկ այնուհետև թանգարանի վերածված Սուրբ Սոֆիան:

Պաշտոնական Անկարան առայժմ որևէ կերպ չի մեկնաբանել Քրիս Սփիրուի նախաձեռնությունը: Սակայն, մտաբերելով 2006թ. Սուրբ Սոֆիայի տաճարում տեղի ունեցած միջադեպը, դժվար չէ կանխատեսել, թե ինչպիսի հետևանքեր կարող է ունենալ Սփիրուի նման համարձակ քայլը:

2006թ. նոյեմբերին թուրքական «Մեծ միասնություն» ազգայնական կուսակցության 39 անդամներ Ստամբուլում գրավել էին Սուրբ Սոֆիայի տաճարը` ի նշան բողոքի ընդդեմ Հռոմի Բենեդիկտոս 16-րդ Պապի Թուրքիա կատարելիք այցի: Տաճար ներխուժելուց հետո ազգայնականները նախ նամազ էին արել, ապա սկսել էին վանկարկել կարգախոսներ՝ Պապի առաջիկա այցի դեմ:

Հիշեցնենք նաև, որ օրեր առաջ թուրք իրավապահներն արգելել էին «Հայ ասպետ» հեռուստամրցույթի հաղթող թիմի անդամներին մոմ վառել, խունկ ծխել և աղոթք անել Աղթամարի սուրբ խաչ եկեղեցում։

Աղբյուրը` ԹԵՐԹ.am

Թողեք Ձեր մեկնաբանությունը՝