Սոցիալական մեդիա և բլոգինգ երկօրյա սեմինար Վանաձորում

Սոցիալական մեդիա և բլոգինգ տեխնոլոգիաներին և գործիքներին նվիրված NeoVision սեմինարների շարքի նախաձեռնողական խումբը հյուրընկալվեց Վանաձորում հուլիսի 16-ին և 17-ին: Վանաձորի Պետական Մանկավարժական Ինստիտուտում երկօրյա սեմինարների ընթացքում մասնակիցներին ներկայացվեցին սոցիալական մեդիա ոլորտի առանձնահատկություններն ու հնարավորությունները, բլոգային տիրույթներն իրենց առավելություններով և տարբերություններով, միկրոբլոգային մի քանի համակարգեր և այլն:

Վանաձորյան սեմինարների ամենաուշագրավ փաստն այն էր, որ երկու օրվա ընթացքում սեմինարին մասնակցեցին ընդամենը երկու տղաներ, մնացած 18 մասնակիցներն իգական սեռի ներկայացուցիչներ էին: Հարկավոր է նշել նաև, որ մասնակիցներն իրենց հետաքրքրվածությամբ թողեցին բավականին լավ տպավորություն. նրանց կողմից տրվեցին բազմազան հարցեր` կապված ինչպես բլոգային միջավայրի և սոցիալական մեդիայի, այնպես էլ հեղինակային իրավունքների, բլոգի առաջխաղացման,  թեմատիկ գրառումների հետ:

Սեմինարի առաջին օրը սոցիալական մեդիա ոլորտի կարևորության և յուրահատկությունների, ինչպես նաև WordPress.com և BlogSpot.com բլոգային տիրույթների և սոցիալական ցանցերի մասին մասնակիցներին ներկայացրեցին ՆեոՄեդիա նախագծի համահեղինակներ Վարդան Պապիկյանն ու Վարդան Գրիգորյանը: Այնուհետև մասնակիցներին Livejournal բլոգային տիրույթի հետ ծանոթացրեց ՁԵՌՔ Հ/Կ ներկայացուցիչ, բլոգեր և լրագրող Արմեն Հովհաննիսյանը (Azatarar):

Սեմինարի երկրորդ օրն հագեցած էր թեմատիկ և մասնագիտական բլոգների մասին տեղեկություններով, որի ընթացքում մարքետոլոգ Լուսինե Նալբանդյանը մասնակիցներին ներկայացրեց մասնագիտական բլոգների մասին իր մոտեցումները:

Երկրորդ օրվա վերջում արդեն ներկայացվեց հայկական բաց բլոգ-պորտալը, ոի վերաբերյալ մասնակիցներրը ցուցաբերեցին մեծ հետաքրքրվածություն: ArmenianOpen.net բլոգ-պորտալը ներկայացնողները հատկապես նշեցին, որ հայկական բաց բլոգ-պորտալում կարևոր է մարզերից եկող տեղեկատվական հոսքը, քանի որ այսօր դեռ այն բավարար ծավալով չի կատարվում և շատ միջոցառումներ և տեղեկություններ չեն հասնում մեզ, որքան որ հնարավոր է:

Վանաձորի երկօրյա սեմինարի ընթացքում մասնակիցներից մի քանիսի համար հենց տեղում ստեղծվեցին բլոգներ երեք բլոգային տիրույթներում. Մասնակիցներից Նոնա Բարսեղյանի համար ստեղծվեց monabars.wordpress.com անձնական բլոգը, Լիլիթ Գրիգորյանի համար lilokgrig.blogspot.com բլոգը և Սեդա Ղումաշյանի Selenngo.livejournal.com բլոգը:

Նշենք նաև, որ Վանաձորյան սեմինարը վերջինն էր NeoVision ամառային արտագնա միջոցառումների շարքից: NeoVision սոցիալական մեդիա և բլոգինգ սեմինարների ամփոփիչ զեկույցը iReport.am կայքում կհրապարակվի մոտակա օրերին: NeoVision սոցիալական մեդիա և բլոգինգ սեմինարների շարքի երևանյան երկրորդ սեմինարի մասին կտեղեկացնենք շուտով, որը տեղի կունենա հուլիսի վերջին:

Վանաձոր քաղաքում սեմինարների կազմակերպմանն աջակցելու համար հատուկ շնորհակալություն ենք հայտնում Վանաձորի Պետական Մանկավարժական Ինստիտուտի ղեկավարությանը:

• NeoVision սոցիալական մեդիա և բլոգինգ երևանյան սեմինարի մասին
• NeoVision սոցիալական մեդիա և բլոգինգ Գյումրի քաղաքի սեմինարի մասին

[Show as slideshow]

1234►

Հավելյալ տեղեկություններ.

• Իմանալ ավելին NeoVision սոցիալական մեդիա և բլոգինգ ամառային սեմինարների մասին` www.neomedia.am/neovision
• Ինչ է սոցիալական մեդիան. սոցիալական մեդիա գործիքներ, բլոգային պլատֆորմներ, միկրոբլոգներ և այլն` www.neomedia.am/publishing
• NeoMedia նախագծի պաշտոնական կայքը