Երևանյան բարքեմփի 2-րդ օրը նույնպես հագեցած էր բազմաբովանդակ պրեզենտացիաներով, սկսած հայկական բլոգոսֆերայից, Երևանյան իրադարձությունների հետ կապված միջոցառումներից մինչև որոնողական օպտիմիզացիա և Drupal համակարգ:

Barcamp Yerevan 2010 միջոցառման երկրորդ օրվա գլխավոր հյուրն էր լինելու Հայաստանի Հանրապետության վարչապետ Տիգրան Սարգսյանը, որին բարքեմփի մասնակիցները նախապատրաստել էին բազմաթիվ հարցեր և առաջարկներ, որոնցից յուրահատուկն էր դիմում և առաջարկը, որում մասնավորապես նշվում էր, որ հարկավոր է Հայաստանի Հանրապետության կառավարական և ոչ կառավարական օրգաններում հետևել, որպեսզի գրառումները, նամակագրությունն ու այլ տեքստային շրջանառությունները կատարվեն հայերեն unicode տառատեսակով և մշակվի ռազմավարություն էլեկտրոնային փոստերի օգտագործման հետ կապված: Նշված դիմում-առաջարկի տակ ստորագրեցին բազմաթիվ մասնակիցներ, որը պետք է հանձնվեր ՀՀ վարչապետ Տիգրան Սարգսյանին:

Հետաքրքիր ներկայացում եղավ Արթուր Պապյանի կողմից, որը ներկայացրեց հայկական բլոգների լրաքաղը, որում նշվում էին այն հայկական ինտերնետային ռեսուրսները, որոնցից կարելի էր ստանալ բլոգային բազմաբովանդակ տեղեկություններ Հայաստանից և ոչ միայն: Մասնավորապես ներկայացվեցին munetik.wordpress.com-ը, որը վարում է հենց Արթուր Պապյանը, ArmFeeds.com հայկական բլոգների ագրեգատոր համակարգը (նախագիծը ներկայացնում է ՆեոՄեդիան), Սամվել Մարտիրոսյանի (Kornelij.livejournal.com) կողմից պարբերաբար հրապարակվող հայ բլոգերների ցուցակը և այլ ռեսուրսներ:

Կարծում ենք, որ արժե նշել նաև մեկ այլ հայկական բլոգային ռեսուրսի մասին, որտեղ արդեն գրանցված են հայկական 211 բլոգներ /ըստ 07,06,2010 տվյալների/, այն է` հայկական բլոգների կատալոգը www.ArmBlogs.ru հասցեով, որը դեռևս միակ հայկական բլոգային կատալոգն է և որում գրանցված են բազմաթիվ հայ բլոգերների հղումներ` ըստ թեմատիկ բաժինների:

Իսկ թե ինչ տվեց Երևանյան բարքեմփ 2010-ը նոր տեխնոլոգիաներով հետաքրքրված հայերին, կիմանանք արդեն հայկական բլոգոսֆերայում հետագայում տեղ գտնելիք արձագանքներից և կարծիքներից:

[Show as slideshow]

Barcamp Yerevan 2010 առաջին օրվա ռեպորտաժը տես այստեղ

Բարքեմփի վերջնամասի մասին ավելի մանրամասն տեղեկություններ է տրամադրում նաև Radio Van-ի բլոգը /տես այս հղումով/