Սոցիալական մեդիա և բլոգինգ սեմինար. օր 2-րդ
ՆեոՄեդիա նախագծի և ARMACAD ցանցի կողմից համատեղ կազմակերպված «սոցիալական մեդիա և բլոգինգ» սեմինարի 2-րդ օրն անցավ առավել հագեցած և ակտիվ միջավայրում:
«Սոցիալական մեդիա և բլոգինգ» սեմինարի երկրորդ օրվա օրակարգով նախատեսված` ներկայացվեցին մի շարք հայ բլոգերների մոտեցումները հայկական և գլոբալ սոցիալական մեդիա ոլորտի, օն-լայն մեդիայի և բլոգոսֆերայի մասին:
Անձնական բլոգինգի իր ծավալուն տեսանկյունները ներկայացրեց Լուսինե Բարսեղյանը, Գյումրի քաղաքից (freedominall.wordpress.com): Լուսինեն խոսեց անձնական բլոգի առավելությունների, սոցիալական ցանցերում ակտիվության մասին, ինչպես նաև` թե ինչ առումով է դրական արդյունքներ տվել իր ակտիվությունը բլոգոսֆերայում:
Լուսինեն հատկապես նշեց, որ իր օրվա մի մեծ մասը անց է կացնում ինտերնետային տարբեր կայքերում, կատարում գրառումներ և մեկնաբանություններ, ինչպես նաև իր մասնակցությունն ունենում հասարակական ներքին միջոցառումներին, որին առավելապես օգնում է նոր մեդիան և սոցիալական ցանցերը, հատկապես Facebook-ը: Լուսինեն պատասխանեց մասնակիցների հարցերին, որոնք կապված էին սովորական հայ բլոգերի առօրյային:
Այնուհետև իր մասշտաբային մոտեցումների մասին սեմինարի մասնակիցների հետ կիսվեց մասնագիտությամբ լրագրող Արման Սուլեյմանյանը, որը ներկայացնում է Ռադիո Վանի բլոգը (blogs.radiovan.am): Արմանը իր ելույթում անդրադարձավ ինչպես բլոգոսֆերային, այնպես էլ հայկական ընդհանուր ներքին հասարակական կյանքին, մարդկանց հետաքրքրություններին, սոցիալական տարբեր հարցերին, որոնք այսօր ակտիվ քննարկվում են հայկական օն-լայն տիրույթներում:
Մասնակիցների բազմաթիվ հարցերին Արմանը պատասխանեց նույնքան եռանդով ծավալուն, ինչպես սկսել էր իր ելույթը: Այդպիսով, հարց ու պատասխանները Արման Սուլեյմանյանի հետ տևեցին մեկ ժամից ավելի:
Կարճ ընդմիջումից հետո Սեմինարը շարունակեց Լուսինե Նալբանդյանը, որը ներկայացնում էր իր մասնագիտական բլոգը (blog.nalbandyan.biz): Մասնագիտական բլոգինգի մասին քննարկումները ևս անցան հագեցած, լսվեցին հարցեր, եղան քննարկումներ:
Ըստ Լուսինե Նալբանդյանի, մասնագիտական բլոգը ոչ միայն սեփական մտքերի արտահայտման միջոց կարող է հանդիսանալ, այլև ինքնազարգացման, նոր կապերի և ծանոթությունների, ինչպես նաև նոր եկամուտների աղբյուրի միջոց կարող է դառնալ. Լուսինեի սեփական փորձը ցույց է տվել, որ մասնագիտական բլոգը նոր բիզնես առաջարկների և համագործակցությունների լավ միջոց կարող է լինել ցանկացած մասնագետի համար:
Սեմինարի վերջնամասում Սոնա Դիլանյանը ներկայացրեց Armacad.info բլոգ-պորտալը` սոցիալական մեդիա ոլորտի տեսանկյունից, որը հայկական օն-լայն տիրույթում միակ ակադեմիական և կրթական երկլեզու բլոգ-պորտալն է: Armacad.info կայքը, միանշանակ, հայկական ամենահաջող բլոգ-պորտալային օրինակներից մեկը կարող ենք համարել:
Այնուհետև, որպես բլոգ-պորտալների շարունակություն, ՆեոՄեդիա նախագծի կողմից մասնակիցներին ներկայացվեց հայկական նոր բաց բլոգ-պորտալային համակարգը` ArmenianOpen.net կայքը: Հայկական բոց բլոգ-պորտալը այսուհետ պատրաստ է համագործակցելու այն անհատների հետ, որոնք ցանկություն կունենան միանալ համակարգին և դառնալ կայքի համահեղինակ:
ArmenianOpen.net-ում կարող են հրապարակվել բոլոր ոլորտների մասին նյութեր բացի քաղաքականությունից և աստղային կյանքից: Մասնավորապես, շեշտը դրվելու է ներքին հասարակական և մշակութային կյանքի և անցուդարձերի մասին հրապարակումներին:
Նշենք, որ հայկական բաց բլոգ-պորտալում համահեղինակ դառնալ ցանկացողները կարող են գրանցվել հենց կայքում` դառնալ համահեղինակ բաժնում, որոնց համար կկազմակերպվի խմբային ուսուցողական երկօրյա հանդիպումներ, որից հետո նրանք կդառնան կայքի լիիրավ համահեղինակներ և կկարողանան կատարել ազատ հրապարակումներ:
ՆեոՄեդիա նախագծի կողմից առաջիկայում ևս կկազմակերպվեն սոցիալական մեդիա ոլորտի և բլոգոսֆերայի հետ կապված միջոցառումներ, որոնց մասին նախապես կհայտարարվի iReport.am և NeoMedia.am կայքերում:
«Սոցիալական մեդիա և բլոգինգ» Սեմինարի կազմակերպիչներ.
ՆեոՄեդիա նախագիծ – www.neomedia.am
Հայկական ակադեմիական համակործակցության և օժանդակության ասոցիացիա – www.armacad.org
Հատուկ շնորհակալություն ենք հայտնում Համահայկական երիտասարդական կենտրոն հիմնադրամին` սեմինարներին աջակցելու համար:
Ամբողջական ֆոտո-ռեպորտաժը այստեղ.
Այլ նմանատիպ նորություններ
| Tweet |
Հոդվածի դիտումների քանակը` 5,792
Թողեք Ձեր կարծիքը կամ մեկնաբանությունը.