Հայաստանը կմասնակցի կապի ոլորտի զարգացմանը նվիրված համաշխարհային կոնֆերնասին,  Հայաստանի տրանսպորտի և կապի  նախարար Մանուկ Վարդանյանի հետ հանդիպման ժամանակ ասաց Հեռահաղորդակցության միջազգային միության (International Telecommunication Union, ITU) գլխավոր քարտուղար Համադուն Տուրեն:

Ինչպես երեքշաբթի «ԱՌԿԱ» գործակալությանը հայտնեց նախարարի մամուլի քարտուղար Սուսաննա Տոնոյանը, հանդիպման ընթացքում նշվել է, որ տարեվերջին Հայաստանում նախատեսվում է ԱՊՀ- անդամ պետությունների ներկայացուցիչների մասնակցությամբ անցկացնել օրենսդրական դաշտի կարգավորման խնդիրների վերաբերյալ սեմինար։

Միաժամանակ նախարարը նշեց, որ ոլորտի ընդհանուր զարգացումը հիմնովին կախված է ոլորտը կարգավորող օրենսդրական դաշտից, որի բարեփոխումների նպատակով ներկայումս ուսումնասիրվում է միջազգային փորձը:

Վարդանայանը նշեց, որ թեեւ Հայաստանում հեռահաղորդակցության ոլորտը բավականին զարգացել է, այդուհանդերձ դեռևս կան չլուծված խնդիրներ:

Նախարարը հյուրին հաղորդեց, որ մոտ մեկ տարի առաջ հաստատվել է տեղեկատվական անվտանգության հայեցակարգը և ներկայումս իրականացվում է այդ հայեցակարգի լայնածավալ ներդրումը:

Բացի այդ,  տրանսպորտի և կապի նախարարության կողմից ներկայումս մշակվում է ՀՀ կառավարության Ինտերնետ հասանելիության ծառայության մատուցման աշխարհագրության ընդլայնմանը, բնակչության լայն շերտերի համար հասանելիության ապահովմանը, ինչպես նաև շուկայում առողջ մրցակցության ապահովմանն ուղղված հայեցակարգը և «Տեղեկատվության, տեղեկատվական տեխնոլոգիաների և տեղեկատվության պաշտպանության մասին» օրենքի նախագիծը:

Վարդանյանը ոլորտի զարգացման համար կարևորել է նաև Հանրային ծառայությունները կարգավորող հանձնաժողովի, Տնտեսական մրցակցության պաշտպանության պետական հանձնաժողովի և գերատեսչությունների  կողմից իրականացվող գործառույթների հստակեցումը:

Նախարարն առանձնացնելով կիբերանվտանգության ոլորտի կարևորությունը` անհրաժեշտ է համարել Հեռահաղորդակցության միջազգային միության կողմից կազմակերպվելիք դասընթացներին հայ մասնագետների վերապատրաստմանը օժանդակելու հարցը

Նախարարը նաև անդրադարձել է նախարարության կողմից մի շարք ծրագրերի գործընթացի իրականացմանը։

Աղբյուրը` Telecom.Arka.am