Ռուսաստանի ԱԳՆ պաշտոնական ներկայացուցիչ Անդրեյ Նեստերենկոն հայտարարել է, որ Ռուսաստանն ու ԱՄՆ-ը ռազմավարական հարձակողական սպառազինությունների (ՌՀՍ) վերաբերյալ բանակցությունների հիմնական մասն ավարտել են:

Նեստերենկոն հաստատել է, որ պայմանագիրն իսկապես կարող է կնքվել Չեխիայի մայրաքաղաք Պրահայում: Այսօր Ռուսաստանի նախագահ Դմիտրի Մեդվեդևն ու ԱՄՆ նախագահ Բարաք Օբաման անձնական հեռախոսազրույցի ժամանակ պատրաստվում են վերջնականորեն համաձայնեցնել պայմանագիրը, որը կստորագրվի ապրիլի 8-ին:

The New York Times թերթը, վկայակոչելով ԱՄՆ վարչակազմում իր աղբյուրները, միջուկային արսենալների կրճատման վերաբերյալ ռուս-ամերիկյան նոր պայմանագրի որոշ մանրամասներ է հրապարակել: Ըստ այդմ` կողմերը որոշել են ռազմավարական մարտագլխիկների քանակը նվազեցնել քառորդ չափով, իսկ հրթիռներինը` կիսով չափ: Այսպիսով` հաջորդ յոթ տարիներին Մոսկվան ու Վաշինգտոնը միջուկային մարտագլխիկների քանակը ներկայիս 2.2 հազարից կհասցնեն 1.5 հազարի, իսկ հրթիռներինը` 1.6 հազարից մինչև 800:

Թերթը գրում է, որ նոր պայմանագիրն ամենևին չի սահմանափակի ԱՄՆ հակահրթիռային համակարգերի տեղակայումը Եվրոպայում: Փորձագետները ենթադրում են, որ պայմանագիրը կդառնա Օբամայի արտաքին քաղաքականության ամենամեծ ձեռքբերումը, ինչպես նաև Ռուսաստանի հետ հարաբերությունների «վերաբեռնման» հարցում ամենաէական արդյունքը:

Աղբյուրը` Կապիտալ / CDaily.am