GNC-Alfa ընկերությունն ավարտել է Հայաստանում օպտիկամանրաթելային ազգային ցանցի հյուսիսային հատվածի շինարարությունն ու սկսել է դրա շահագործումը:

Ինչպես հինգշաբթի «ԱՌԿԱ» գործակալությանը տեղեկացրեցին ընկերության մամուլի ծառայությունից, ցանցի հյուսիսային հատվածը գտնվում է Երևանի և հայ-վրացական սահմանի միջև և հատում է այն երկու կետում՝ Բագրատաշենի և Տաշիրի մոտակայքում:

Երևանի և Իրանի սահմանի միջև գտնվող GNC-Alfa ընկերության ցանցի հարավային հատվածը շահագործման է հանձնվել 2009 թ.-ի սեպտեմբերին:

Այսպիսով, GNC-Alfa-ն դիվերսիֆիկացրել է ինտերնետ հասանելիության իր միջազգային խողովակները և հնարավոր է դարձրել Հայաստանի տարածքով Հյուսիսի և Հարավի միջև միջազգային տարանցումը:

GNC-Alfa ընկերությունը հիմնվել է 2007 թվականին։ Ընկերության գործունեության հիմնական ուղղությունները հեռահաղորդակցման մայրուղային ցանցերի կառուցումն ու շահագործումը և տրանսպորտային ցանցի ծառայությունների տրամադրումն է։ GNC-Alfa-ն արդեն ավարտել է Իրանից Երևան օպտիկամանրաթելային մայրուղային մալուխի շինարարությունը և ստացել է մինչև Վրաստանի սահմանը մալուխի շինարարությունը շարունակելու թույլտվություն։

Ծրագրվում է, որ հյուսիսում ցանցը կմիանա կապի նվազագույնը երկու օպտիկամանրաթելային գծերի, որոնք գործում են Վրաստանի տարածքում՝ նման կերպով ապահովելով Հայաստանի տարածքով բարձր արագությամբ տարանցման ծառայությունների մատուցումը: Երկրի ներսում ցանցը կերկարացվի մինչև Հայաստանի խոշոր քաղաքները:

Հայաստանում այսօրվա դրությամբ գործում է մեծածախ ինտերնետի երկու օպերատոր: Առաջինը «ԱրմենՏել» (ապրանքանիշը՝ Beeline) հեռահաղորդակցական ընկերությունն է, իսկ երկրորդը՝ FiberNet Communications-ը: Հոկտեմբերի 15-ից հայկական շուկա է մտել մեծածախ ինտերնետի ևս մեկ փրովայդեր՝ GNC Alfa ընկերությունը:

Աղբյուրը` Telecom.Arka.am