Այս տարվա նոյեմբերին ամերիկյան Կալիֆոռնիա նահանգում տեղի կունենա մարիխուանայի օգտագործումն օրինականացնելու վերաբերյալ հանրաքվե։ Լոս Անջելեսի ընտրական հանձնաժողովը երեկ հավաքել է ավելի քան 433 հազ. ստորագրություններ, որոնք անհրաժեշտ են հանրաքվեի անցկացման համար։ Այդ մասին հաղորդում է UPI գործակալությունը։

Մարիխուանայի օգտագործման օրինականացման դեպքում 21 տարեկանից բարձր կալիֆոռնիացիները կկարողանան գնել մոտ 28գ մարիխուանա, ինչպես նաև աճեցնել կանեփ սեփական օգտագործման նպատակներով։

Հասարակական կարծիքի հարցման համաձայն՝ կալիֆոռնիացիները, ամենայն հավանականությամբ, կքվեարկեն օրինականացման օգտին։ Նախաձեռնության կողմնակիցները կարծում են, որ մարիխուանան այդքան էլ վտանգավոր չէ և ալկոհոլի կամ ծխախոտի պես կախվածություն չի առաջացնում։

Բացի այդ, մարիխուանայի վաճառքներից ստացված հարկերը նահանգային բյուջեին 1,3 մլրդ դոլարի լրացուցիչ եկամուտ կապահովեն։ Սակայն նախաձեռնության հակառակորդները մեջբերում են հանցագործությունների վիճակագրությունը, որոնք կատարվել են մարիխուանայի ազդեցության տակ, ինչպես նաև անչափահասների թվում դրա օրեցօր մեծացող տարածումը։

Աղբյուրը` ԹԵՐԹ.am