«Էլեկտրոնային հաղորդակցության մասին» օրենքի համաձայն` ինտերնետի շուկայում վերջնական սակագներ սահմանված չեն. դրանք ամբողջությամբ կարգավորում է շուկան: Հանրային ծառայությունները կարգավորող հանձնաժողովը ֆիքսել է, որ 2008թ. համեմատ այսօր Հայաստանում մանրածախ շուկայում ինտերնետի գները շուրջ երկու անգամ նվազել են:

Ուսումնասիրությունները ցույց են տվել, որ գների անկումն ավելի շատ ազդել է բարձր արագությամբ ինտերնետի վրա: Այս մասին այսօր հրավիրած ասուլիսում ասաց ՀՀ Հանրային ծառայությունները կարգավորող հանձնաժողովի անդամ Սամվել Արաբաջյանը: Նրա խոսքով` նախորդ տարվա նոյեմբերին կարգավորող մարմնի ընդունած՝ ինտերնետի առավելագույն թույլատրելի սակագների սահմանման մասին որոշումը դրական ազդեցություն է ունեցել շուկայի վրա:

«Որոշումն ուժի մեջ է մտել այս տարվա հունվարի 1-ից, սակայն ընկերությունները բավականին ճկուն են գտնվել և գներն սկսել են նվազեցնել նախորդ տարվա նոյեմբեր-դեկտեմբեր ամիսներին` հունվար, փետրվար, մարտ ամիսներին ակնկալելով բաժանորդների թվի ավելացում: Շատ ընկերություններ անգամ միևնույն վճարի դիմաց առաջարկել են 2-3 անգամ ավելի արագ ինտերնետ»,- ասաց մասնագետը:

Եթե 2005թ. Հայաստանում ինտերնետի թողունակությունը 18 մեգաբիթ է եղել, ապա 2010թ. հունվարի 1-ի դրությամբ այդ թիվը հասել է 3.6 գիգաբիթի, որն այսօր 90 տոկոսով ծանրաբեռնված է: Այսօր լայնաշերտ ինտերնետի բաժանորդների թիվը Հայաստանում հասնում է 70-75 հազ.-ի, իսկ 40-45 հազ.-ն օգտվում են dial-up-ից: Ըստ մասնագետի`տարեցտարի dial-up-ից օգտվող բաժանորդների թիվը նվազում է: Դա նշանակում է, որ մարդիկ ավելի արագ և հուսալի ինտերնետ են նախընտրում:

Աղբյուրը` ԹԵՐԹ.am